شاهد على التاريخ
*************
في عز الليل وأنا ماشي
لقيت طوبة بتنده لي
وقالت ليه بتستغرب
دنا في الأصل أعجوبة
أنا حفنة تراب ناعم مع مية
ولو تعرف هتكتبني ك مرثية
أنا أصلا من الفراعين
أنا برهان بإنك طين
أنا عشت التاريخ كله
وشفت العز للمصري وكمان ذله
أنا الشاهد على الطغيان
أنا الناجي من الهذيان
حاولت كتير أكون إنسان
ولو وصفوني ب العصيان
مشيت جوا الزمن أحقاب
لقيت شياطين بزي أصحاب
وشفت الناس غلابة يهوه
وشفت جبان ب يقتل أخوه
ولما جت سفينة نوح
وقلت الشر بقى مفضوح
لقيت الظلم ساد واغتر
وعدل الدنيا مات مضطر
ودي حكاية في كل زمان
وكأس الذل بقى عنوان
وإن كان فيه كمان أحرار
بقوا يقاوموا وعاشوا مرار
ووقفوا في وجه لستعمار
و ماتوا مرفوعين الراس عشان ثوار
ومش عاوز تتوه مني وانا طوبة
ولا غرورك يصور صورة مقلوبة
مهو التاريخ بيتزيف بحفنة جاز
وحكام البشر قالوا إن دا إنجاز
شويه يبقوا م السادة وكله عبيد
يمصوا دمهم بالخوف بيد حديد
تموت البسمة ف عيونهم وتنهيده
وطفل يتيم يبات يحلم بتغريدة
من العصفور لكن يفضل مجرد حلم
بأن القسوة والجبروت وكل الظلم
هيتلاشوا وهيهاجروا بلا عوده
ويتمنى التاريخ يخلى من الفوضى
ونرجع تاني لحكايتي اللي مكتوبة
آلام و دموع وعبرة يا دنيا منكوبة
بقلم أحمد سلاطين
ليست هناك تعليقات:
إرسال تعليق