ماطيشة دارت لكرون...
بقلم:حميد النكادي.( زجلية مغربية ).
هز البردعة وصبر
إلا قدرتي تصبر
الطريق طويل
اسكت أو هضر
ماكاين لي
جايب ليك خبر ...
لعوافي شعلت
حرقت اليابس
ؤ زادت لخضر ...
الجيب خاوي
عمرو ما يعمر
اليد قصيرة
على قد الحال
شوف واسكت
ما ينفعك
نظر و لا بصر...
زادو فالفول
لعدس والقصبر
بطاطا ومطيشة
طاجين المسكين
دوازو مر...
الصردي فالقبة
فوق الجمر
وانواع الحوت
وكيسان لخمر ...
ناس زاهية
ماتخاف من الفقر
وأنا وأنت
غلبنا يطرو زيت
وكيلو بطاطا
ؤ حبات من
لبصل لمشحر
فين غاديين بنا
الشكوى لله
تابعينا حتى لقبر ..
16/2/2023 عين تاوجدات ...
ليست هناك تعليقات:
إرسال تعليق