(أزمتنا أزمة أخلاق)
أزمتنا أزمة أخلاق
وضمير يصحيٰ جوانا
ليه الكل بحياته ضاق
لما راح ودنا وهوانا
ونسينا بينا الأذواق
وورا الدنيا جرينا في سباق
ونسينا حبايبنا أغراب معانا
وعصينا الخالق موزع الأرزاق
ففقدنا من اللقمه المذاق
رغم الأصناف في الأطباق
ولما الخير جوانا راح
الكل عاش في جراح
ولما المحبه في قلوبنا ماتت
من حياتنا البركه ضاعت
وماعدش فيه بينا امان
وحالنا صبح عدمان
والكل علي عمره ندمان
ولما علمنا ولادنا الدلع
وافتكرناها تبقي حنيه
ملينا نفوسهم بالطمع
وعلمناهم بإيدينا القسيه
الإبن لما كبر صبح عاق
والحبايب ودعت الأشواق
ومبقاش خلاص عشاق
والخيانه صبحت بين الرفاق
والصحبه صبحت غدر ونفاق
والإخوه ع الميراث في سباق
والدم بينهم علي شانه أراق
الكل عايش من غير إحساس
اللي معاه بخيل ع الناس واللي مش معاه منداس
ومحدش عاجبه حاله
لآ راضي ولآ مرتاح باله
بوح ياقلبي بوح
كفايا ألم وجروح
العيون شايفه وساكته
والقلوب علي بعضها جاحده
الظالم غِير نفسه مش شايف
والمظلوم لسانه متلجم وخايف
خلصي دموعك ياعيني
وياهموم قلبي إرحميني
وسيبك ياقلبي من الهموم
واللي جواك سيبه مدفون
لوحدك مش ح يتغير الكون
والناس كمان مش تمام
عايشين في دنيا الأوهام
وراكبهم علي طول شيطان
ونفوسهم مش زي اهل زمان
الوفا من جواهم راح
وطمعهم خد معاه الأفراح
وأقول إيه ولمين ياقلبى
واللي جوايا كتير مستخبي
الجدعنه والشهامه فين
وعلي بعض ليه قاسيين
ننهب بعضنا ونقول شطاره ونظلم نفسنا ونقول دنيا غداره
وعقولنا تاهت وظلمنا الدنيا معانا
إيه ياناس اللي غيرنا
وليه طمعنا وجشعنا يحيرنا
وازاي الدنيا ح ترحمنا
واحنا مابنرحم بعضنا
وطول مااحنا بالشكل ده مش ح يجيلها يوم تفرحنا
ولا الأحزان ح تفارقنا وتودعنا
إبكي يادنيا وحني علينا
الطيبين راحوا من حوالينا
واحنا اختارنا العذاب لنفسنا
ومين غير الحبايب يداوي جرحنا
وانتي يادنيا سرقتي العمر مننا
وما فهمناش معناكي كلنا
ولو بكينا ع العمر اللي راح
باقي كام سنه من عمرنا
خواطر ( أشرف الدغيدي )
حقوق النشر محفوظه
ليست هناك تعليقات:
إرسال تعليق