بشعر العامية المصرية
( افتح حوار للكل )
افتح حوار للكل َوسيب الناس تتكلم
عمر الحوار ما يضر ولا الحياه بتضلم
خلي الحوار كدا حر خٓلِّي الجميع يتعلم
نفسي الحوار دا يسر ما حد منه يتألم
خلي الحوار بنّاء بوجوه محايده أمينه
واسمع كلام عقلاء بهدوء وكل سكينه
عمر الحوار ما أساء لا لغيرنا ولا لينا
دا المصري كله عطاء وهدفه رخا أهالينا
عايزين حوار متنوع متعدد الآراء
واضح ولا يتلون م الألف لحد الياء
ومن كل طيف زود واحد من الحكماء
دا كل حزب اتعود يبيِّن لكن بدهاء
ليبرالي أو ثورجي أو حزب كان غضبان
علماني أو مصلحي أو حد كان غفلان
أو سلفي قال مذهبي في السنّه والقرآن
أو شخص كان بيعارض من جُوَّا البرلمان
الكل على كوكبي مصلح ومصر أمان
افتح لنا الحوار جمَّع كل الطوايف
طفِّي لهيب النار طمِّن كل اللي خايف
عمٌِر وخلي الدار تتهنى خليك عارف
لغة الحوار بتدار بكلام ماهواش زايف
قضيه وراها قضيه والحسم فيها وارد
ومشاكل الألفيه عالطاوله بشكل زايد
والرأي بالأغلبيه والفرصه نورها قايد
في شكل ديمقراطيه وحوار مليان فوايد
الشعب مستتي كله نهايه للحوار
منتظر حد يدله ويرسيه عالقرار
قرار يعوض صبره ويحس بالانتصار
ويريح باله وصدره ويحطم الانكسار
يا سنين الفقر عدي ما بقاش فيه انتظار
إحنا قبلنا التحدي وخلينا الليل نهار
يا أزمه ليه بتشدي ريحك دا كان جبار
بكره الحوار دا يطفي قلوب جواها نار
----------------------------
بقلم د / عبد الرحمن فتحي الحناوي.
من مصر.
الأربعاء ١٤ من سبتمبر سنة ٢٠٢٢.
ليست هناك تعليقات:
إرسال تعليق