((ماكنش عشمي ))
ماكنش عشمي
وما كنش ظني
أعيش وحيد
وسط إللي كانوا
في يوم أهلي وحبايبي .....
ولا كان في بالي
كل دا يجرالي
يجرحوني ويكسروا
فيا مشاعري وقلبي .....
ليه بالرخيص باعوني
وبكوا دمع عيوني
وكانوا أول ناس ظلموني
دا الظلم حرام ياربي .....
طبعهم قاسي وأناني
تعبوني وهزوا كياني
وغُلبت أقول آه ياني
أنا بسي كان إيه ذنبي .....
أخلاقهم صعبة ورَدِية
بقسوة ياما جُم عليا
وما رحموا دمع عينيا
وأنا بتحمل ياما وأخبي .....
دي الدنيا مش مستاهلة
لكن عقولهم جاهلة
بالحب الدنيا هتبقى سهلة
دا أنا ع الحلال متربي .....
بدعي ربنا يهديهم
وأشوف الحب ف عينيهم
ودايماً في الشدة ألاقيهم
والكل يسير على دربي .....
ماكنش عشمي
الأديب الدكتور/ وحيد محروس خليل
ليست هناك تعليقات:
إرسال تعليق