رباعيات من الحياة
بقلمي يحيى حسين
دنيتنا سكك ومفارق
ناس جايه وناس بتفارق
ناس لينا وجودها حياة
وناس تانية غيابها ما فارق
في الدنيا سكك ودروب
مشيناها شمال وجنوب
كام مرة حصدنا الخير
وكام مرة زرعنا ذنوب
في السكة صادفنا جبال
وعدينا تلال وبحور
ومشينا ساعات برمال
وحلمنا بجنة وحور
في السكة وقعنا كتير
وكملنا الحياة مشاوير
وساعات وكأننا بنطير
بجناحنا مع العصافير
في السكة شفنا حدود
وحلم بطريق مسدود
وناس تنده تقول حرية
وناس مكبلاها قيود
في السكة لقينا جعان
شايف الحياة بألوان
وبالسكة شفنا غيلان
بحصونهم ما عرفوا أمان
في السكة سمعنا حكاوي
عن عشق وغرام وغناوى
وحبيب بحب حقيقي
وحبيب للخداع كان غاوي
في السكة عرفنا رجال
ماتتاقل في يوم بالمال
وفي السكة قابلنا عيال
عايشين الحياة أندال
للسكة أكيد بدايات
والدنيا لازم تنفات
وإن عشت مهما اعيش
بالآخر حيقولوا ده مات
يارب أدينا عايشين
في السكة كدا ماشيين
يا رب أهديلنا طريقنا
وأرحمنا بيوم الدين
يحيى حسين القاهرة
23 يناير 2019
ليست هناك تعليقات:
إرسال تعليق