في عصر الهرتلة بقت الفلوس بتدوس
واحد مولف عليك والتاني حرس مخصوص
وواحد يقول الحاج والتاني يقول ده قاموس
شوفت العجب وربنا في عصر الهرتلة المحروس
شوفت القرف بطلته والرقص فيه مدروس
شوفت الصعب سهل ف عصر أحضن وبوس
شوفت ال عمل حمار وركبه ابن اللصوص
والضحكة عريضة قوي لعب العيال بفلوس
ٱه وٱه يازمن شايف من بعيد الكابوس
شايف الكتير إنكسر وباع ال كان خلبوص
باع الكتير من ذمته ونسي الضمير بيدوس
حتى القريب إنكسر وقلع العقل بلبوص
الصح عنده غلط والعقل فيه منقوص
المادة أشترت الذمم ف زمن أنهب وعيش
كنت زمان انكسف أمشي ف زفة عريس
ليقولوا شوفوا الولد بيلاغي البنات منجوس
النهارده بشوف الزمن فتحها بحر هويس
لا عارف مين العروسة ولا حتى مين العريس
الكل بيرقص فرح والنقطة تعلي الرخيص
ٱه وٱه يازمن من شُغل العيال السيس
حبوا الرقص والحنجلة واللعب ع المكشوف
...................................................................
بقلمي / جمال حلمي ابراهيم عامر
في عصر الهرتلة. / عامية
ليست هناك تعليقات:
إرسال تعليق