(دنيا غروره)
دنيا غروره وماليها كبير
وإوعي تفكر فيها كتير
وتجري وراها من غير تفكير
وعشان رزقك إوعاك تحتار
وإوعي للحرام يوم تختار
واوعي تخاف يوم من بكره
وارمي حمولك علي رب الكون
وإياك للمال يوم عبد تكون
يوماتي هتبات الليل مهموم
وتعيش دايماً عيشة المديون
واوعي الحزن يأثر فيك
هتلاقي الهم في القلب شريك
وإوعاك تاخد الندل صديق
هيفضح سرك ويبيع فيك
وان كان رزقك علي قد الحال
هيبارك فيه لو جِبتوا حلال
وإحمد ربك بالبركه يزيد
وتعيش في الدنيا والآخره سعيد
عمر الرزق ماكان في المال
ممكن رزقك تلقاه في عيال
او في الصحه وراحة البال
او في الستر من مد الإيد
خليك صابر دايماً علي حالك
وبرزق حلال ربي عيالك
وخلي الرضا والقناعه اساس
هتعيش دايماً مرفوع الراس
وتبقي سعيد وسط الناس
وعمرك ابداً مايوم تنداس
واوعي المظاهر تغُرك يوم
وتعيش دايماً في حسره ولوم
الناس معادن يابن الناس
زي الدهب وزي الماس
ناس تنشال دايماً ع الراس
وناس بالمداس دايماً تنداس
واقفل قلبك بالترباس
واوعاك تفتح أبداً بابه
غير لأصيل يصون أحبابه
ويرفع قدرك بين الناس
وإوعي تآمن يوم لخسيس
هيكون دايماً غدار وخبيث
خواطر (اشرف الدغيدي)
حقوق النشر محفوظه
ليست هناك تعليقات:
إرسال تعليق